Ләйлә Исламова: «Өзіңе сен, өзіңді алып шығар еңбегің мен ақылың екі жақтап»

Әлеуметтік деген сөз осыған саяды. Айта кетейін, мектептің оқу бағасы қолжетімді. Ақтөбе қаласындағы бағасы тиімді мектептердің бірі десем қателеспеймін. 

- Жасөспірімдермен жұмыс істеу қиын ба? Оларды қандай мәселелер мазалайды? Әсіресе, жастардың назарын ұстау, оларды қызықтыру қаншалықты қиын?

- Жалпы өскелең ұрпақтың тәрбиесіне бағытталған жобаны бастау өте қиын. Жаңа жоба, оның ішінде мектеп ашып, балалармен, олардың ата-аналарымен жұмысты бір жолға қою тіптен оңай емес. Оған көп күш-жігер, ерекше біліктілік, сонымен қатар өзімнің жобама деген сенімділік қажет болды.

Сондықтан, ең алдымен осы миссияны орындай алатын команда жасақтадым. Менің идеямды қолдап, ерекше қабілеттері бар оқытушыларды өз әдістемеммен сабақ беруге үйреттім. Бұл методика АҚШ, Еуропа білім жүйелерінен алынған, дегенмен, жергілікті менталитетке бейімделген. Сабақ барысында мықты әдістерді, техникаларды қолданамыз.

Қазір оқытушылар құрамында төрт мұғалім бар. Екеуі қазақ, екеуі орыс топтарына сабақ береді. Мен өз командамның потенциалына сенемін, балаларды қызықтыру, олардың назарын ұстау жолында әлі де болса жаңа әдістерді алып келеміз.

Балаларды не толғандырады деген сұраққа келер болсам, олардың басты мәселесі – сенімсіздік. Өздерінің білімдеріне, күштеріне сенбейді. Қолымнан келмейді, біліктілігім әлі аз деген ойларды жастарды тура жолдан тайдырады. Біздің оқытушылар сол балалардың бойларына сенімділік ұялатып, қабілет-қарымдарын дамытуға тырысады.

- Осы саладағы жетістіктеріңіз жайлы айтып берсеңіз. Мектеп ашпас бұрын, қандай да бір тренинг, форумдар өткіздіңіз бе?

Әрине, мұндай оқу орнын ашпас бұрын өзімнің жеке қабілеттерімді дамыттым. Осы уақытқа дейін онлайн, оффлайн курстарымнан екі мыңға жуық адам өтті. Мен әрдайым, форум, тренингтер өткізіп тұрамын.

Қазір шешендік өнер жаттықтырушысы ретінде өзімді дамытып жатырмын. Коммуникация, көшбасшылық, кәсіби бейімділік, адамның бойындағы жұмсақ дағдыларды дамытуға да көп көңіл бөлемін. Соның дәлелі ретінде Америкада «Сommunity solutions program» бағдарламасымен төрт ай бойы жұмыс істеп, стажировкадан өттім. Вашингтон қаласындағы Джордж Мэйсон университетінде коммуникация және көшбасшылық модулін аяқтап, сертификат иелендім.

Балаларға теориямен қатар, практиканы да үйретеміз. Әр оқушы ең алдымен анкета толтырады, оған өз арман, мақсаттарын жазады. Оқу барысы кезінде оқушылардың сол қалауларын ескереміз.

Бір мысал айта кетейін, Ақтөбеде «Life4job» тігін фабрикасы жұмыс істейді. Аталған жердегі өндірістің, бизнестің қалай жасап жатқанын көрсету үшін балалармен экскурсияға барған болатынбыз. Киім дизайнері, модельер, тігінші болудың қыр-сырына бойлап, аталған бизнесті көздерімен көріп қайтты.

Сонымен қатар, балаларға әр апта сайын белгілі адамдармен онлайн кездесулер өткіземіз. Әрине, балаларға көрсететін көмек біржақты ғана болмау керек. Сондықтан, балалардың ата-аналарымен коучинг форматында кездесу мен тренингтер ұйымдастырамыз. Мұндай тәсіл өз жемісін береді, себебі, ата-ана мен баланың арасында түсіністік, байланыс пайда болады.

- Жасөспірімдер үшін ауызекі сөйлеу шеберлігі турасында арнайы бағдарлама бар ма? Психологиялық әдістер, ата-анамен жұмыс сияқты әдістемелер туралы айтсаңыз?

- Бүгінгі таңда біз әлеуметтік желілерге аса мән беріп жатырмыз. Жасөспірімдерге SMM, фото-видео түсірілім, монтаж сияқты қажетті дағдылар қосымша ақша табуға мүмкіндік береді. Осыны ескеріп, талантты SMM маманын шақырдық, қазір ол біздің үш оқушыны оқытып, біреуі компанияда, екеуі біздің мектептің әлеуметтік желідегі парақшаларын жүргізіп, ақылы стажировкадан өтіп жатыр.

Көптеген оқыту орталықтары кәсіби бейімдеу тестілеуінен өткізіп, балаларға мына мамандыққа икемің бар деп жібере салады, ал, біздің мектеп компания қажеттіліктері мен баланың қызығушылығын ескеріп, тәлімдемеге жібереді. Жазғы демалыс кезінде осыдан артық пайдалы іс жоқ деп білемін.  Ақтөбеде бірнеше компаниямен келісім-шартымыз бар, соларға сәйкес, әр оқушының сол компаниядағы супервайзері баланы бір ай бойы жетекшіліне алып, білген-түйгенімен бөліседі.

- Ақтөбе қаласы әкімдігі немесе Білім және ғылым департаменті/басқармасынан көмек, қолдау болды ма, әлде жалғыз өзіңіздің еңбегіңіз бе?

- Ең басында жобамызды жалпы орта мектеп бағдарламасы аясында жүргізу туралы жоспар болды, сол үшін тіпті Ақтөбе қаласының білім және ғылым департаментінің қабылдауына барамын деп шештім, бірақ ол шаруа әлі келіспеді.

- Бастамаңызды түсінгендер бар ма? Сізді кім қолдады?

- Барлық адамға қолдаушы керек. Қандай да жоба болмасын, қандай да іс бастамас бұрын, қасыңда сенің идеяңды қолдайтын, саған сенетін адамдардың бар болуы аса маңызды. Маған қолдау танытқандар көп болды, туған туыстарым, достарым, тіпті көршілерім жобамның сәтті болатынын айтып, қолдау көрсететін.

Халық арасында «сарафанное радио» деген түсінік бар, соның арқасында мектептің ашылғаны туралы жаңалық Ақтөбе жұртшылығына тарады. Осы орайда менің он алты жылдық оқыту тәжірибеме, біліктілігіме сенген ата-аналарға алғысым шексіз.

- Қызмет жолыңызда нені ерекше атап өтер едіңіз?

- Мектебімізде тек балалар ғана емес, ересектер де өздерінің біліктіліктерін дамыта алады. Менің жас кезімде мұндай оқу орындары болмаған, ата-анамда ондай мүмкіндік те болмады.  Тіпті оны былай қойғанда, 1992 жылы өзімнің оқып жүрген орта мектебім көмірдің жоқтығынан жабылып қалған болатын.

Сол кезде әкем мені апамның қолына қалаға жіберді. Мектеп, колледждің біліміне аса қанағаттанбайтынмын. Теорияны үйретіп, практиканы ұмытатын. Біліктілікті арттыратын қолжетімді курстар болса ғой деп ойлайтынмын. Мектеп ашуымның бір себебі де осы болар. Орыс халқында «все мы родом из детства» деген жақсы сөз бар, сондықтан кішкентай кезімде ала алмаған білімімді өскенде жетілдіріп, басқаларға мүмкіндік бергім келді. Айта кетейін, өзім Алматыдағы Құдайбергенов Жұбанов атындағы педагогикалық университетті бітіргенмін.

- Осындай жұмысты қолға алғысы келетін адамдарға қандай ұсыныс тілек айтар едіңіз?

Өзіңіздің ниетіңізге, қабілетіңізге сеніңіз, жоба идея ретінде қалып қоймасын. Сонымен қатар, жаныңызда осы идеяңызды қолдайтын, мотивация беретін адамдар болуы маңызды. Менің командама қосылып, мектепте білім бергісі келетін оқытушыларға резюме жібер, видео түсір деп айтпаймын.

«Менің жобам Сізге несімен қызық?» - осы сұраққа ең ұтымды жауап берген, көзі жанып тұрған, тың идеясы бар адамдарды қабылдаймын. Идея бар, бірақ қорқамын деуге болмайды. Көз қорқақ, қол батыр. Мен осы позицияны ұстанамын. Жуырда Нұр-Сұлтан қаласында ашыламыз, әрине қорқыныш бар, алайда сенімім мықты. Абайша айтқанда, «ақылың мен еңбегің екі жақтап алып шығады».